U Nongsainhima

Tuesday, June 13, 2006

Wan hi heh ka All India Congress Committee

Ki arngut ki heh ka All India Congress Committee (AICC) u Oscar Fernandez bad u Maj. Ved Prakash, kim shym la lah ban rai halor ka jingdawa pynkylla nongialam ha ka Seng Congress bad ki la bynshet ha ka hehduh jong ka Seng Congress ka Sonia Gandhi ban ai ia ka rai.

Ia kane rai la shim ha ka jingialang jong ka Congress Legilature Party(CLP) kaba la ia kynduh mynta ka miet ha Pine Wood Hotel ka la rai da kawei ka sur ban aiti beit ha ka Sonia Gandhi ban bishar bniah halor kane ka kam pynkylla nongialam hapoh ka jylla Meghalaya bad ia kane ka rai yn sa phah sha kane ka jylla hapoh kine ki khyndiat shwa ban sdang ka Dorbar Mang Tyngka ha ka 16 tarik.

La iathuh ia kane ka rai kaban long ruh ka rai ia ka lawei u Dr D.D Lapang la un dang neh kum u nongialam ne un hap ban hiar shuki noh yn sa pyntip da kitei ki heh ka AICC sha ki nongialam ka Congress ha kane ka jylla hapoh kine ki 3 sngi ban wan.

Haba iakren bad ki nongthoh khubor hadien ba la wai ka jingialang u Secretary ka AICC ba dei peit ia ka jylla u Oscar Fernandes ryngkat bad u Major Ved Prakash ki la iathuh ba ka CLP da kawei ka sur kala aiti haki ban leit rah beit ia ka kaiphod sha ka President ka AICC ban bishar bad ai iaka rai kaba khatduh bad halor kane ka nongrim ki la pdiang bad mynjur ruh ban leh kumta. Na kane ka daw, u Oscar u la rai ban pynpep noh ia ka jingleit jongu sha Imphal lashai ka sngi bad leit phai biang sha Delhi khnang ban leit rah hakhmat ka Madam Sonia ia kaei kaba u la lap ne shem hi da lade ha ka jingiakynduh bad ki 18 ngut ki MLA bad kumjuh ruh ia u Myntri Rangbah bad ka kynhun jongu.

Shwa ia kane, u Oscar naduh ka por 5 baje haduh 8 baje la lah ei ei u la ia kynduh ia uwei pa kawei na ki MLA kiba ieng pyrshah bad dawa pynkylla nongialam noh ia u Dr D.D Lapang ha Pine Wood Hotel.Ha katei ka jingiakynduh ki MLA Kiba ieng pyrshah ki la pynpaw ia ki daw tynrai hakhmat u Fernandes ba ki la hap ban poi shaduh une u pud ban dawa pynkylla nongialam namar kim lah shah shuh bad kin nym pdiang ne mynjur hi ruh wat la ka AICC ka dang iai pynneh ia u ruh. U Fernandes u la iathuh ym tang ba la sngap ne thoh ia kaei kaba ki la kren hynrei la ring ruh da ka video camera bad ia kane yn sa leit rah sha ka Sonia Gandhi kaban bishar bad ai ia ka rai kaba khadduh. U la ban shuh shuh da kaba ong, ym tang katta hynrei ia ki memorandum bad ki jingujor pyrshah ia u Dr Lapang yn leit rah lang sha Delhi.

Haba iakren bad ki nongthoh khubor na ka liang u Dr Lapang ruh, u la ong “ Ngan shaniah beit ha ka rai jongka President ka AICC kumba la rai da ka CLP bad ia kaei kaba kan rai ngan pdiang beit.

Halor ka jingkylli pat ia u Oscar hato kaei ka daw ba um lah ban ai ia ka rai mynta ka sngi khamtam haba la thung ia u ban peit ia kane ka jylla u la ong “ Ia nga la thung ban peit ia ka jylla hynrei kumba ka Congress ka dei ka party kaba iaid beit iaid tyntih kumta ruh kumba dei ka rukom naduh mynhyndai, ia ka rai ba khadduh hi yn ai beit da u ne ka president jong ka AICC kaba dei ka bor ba hakhlieh duh jongka Congress. Kumta halor kane ruh u la ong ba un leit rah hakhmat jongka ia kaei ka jingshem jongu bad kan sa ai pat ma ka ia ka rai.” Ia kane ka rai kan sa ai lashai ne la shisngi bad yn sa pyntip sha ki nongialam hapoh kane ka jylla ong u Oscar Fernandes.

Kine ki liang kiba ieng pyrshah pat ia u Dr Lapang ki la kam ba ki nang kiew ka jingbun paid. Namar mynta ka sngi ki la kot shaka 18 ngut kata kynthup ia u Dr Mukul Sangma uba la mih madan mynta hi ka sngi. Nalor kane, ki la kam ba kiwei kiba la don sha ka liang jongki ki long u Zenith Sangma, u Brening A Sangma bad wat u Speaker ruh u Martin M. Danggo katba ia u ma Shitlang ki la iathuh ba ki dang khein 50 -50 namar um pat ai ia ka rai kaba skhem. Ki la ong ba kitei ki dei kiba ki shim jingkhein, hynrei u bah J.D Rymbai lei lei u dei uba ki la khein beit naduh ka sngi ba nyngkong namar ki la shaniah beit ha u ia ka kam nongialam.

Kine kiba ieng pyrshah ia u Dr Lapang , ki la pynpaw da kajuh ka sur hakhmat u Fernandes ba kin pynkylla nongialam beit bad lada jia ba ka AICC kam pdiang ne mynjur kin leh syndon da ka kam wat hapoh ka Iing Dorbar la ka long ha kano kano ka rukom ruh tang ban pynkhyllem khlemrain ia u Dr Lapang. Namar ki ong haba kwah ban ia pynbeit hapoh ka Party ruh ym don ba sngap kumta kim banse ban thad madan syndon hapoh iing dorbar.

Nalor kane, kawei ka khubor ka iathuh ba kane ka jingrai mynta ka sngi ka la long hi kumba pynneh biang ia u Dr Lapang hynrei ha kajuh pat ka por la ioh jingtip na Delhi ba kane ka dei ka rai kaba la aibor hi naduh Delhi namar ki sngewthuh ba kiba bun kim kwah shuh ia u Dr Lapang ban dang bteng kum u nongialam kumta ruh ki heh ka AICC na Delhi kin pdiang beit ia ka rai jong kiba bun kata ka mut ban iaid beit shakhmat ban pynkylla nongialam. Dei na kane ka daw ba ki heh ka AICC ruh kim kwah ban kynthoh namar la dep pyrkhat ba ka AICC kan ai ia ka rai khnang ban nym don ka jingpait jingpra hapoh ka party.